Pasok

Alay ko ang lathalang ito sa mga...

Mag-aaral na bumabalik sa silid na kanilang araw-araw nanamang pupuntahan at tatambayan hanggang sa susunod na taon.

Nagdadala ng ga-bahay na bag laman ang crayola, pencil case, sangkaterbang aklat at kwaderno, packed lunch, at goodmorning towel.

Nastranded sa baha, lumusong sa baha, inanod ng baha, nagkasakit dahil sa baha at malakas na ulan.

Nagdiwang dahil suspended ang klase.

Nagpalusot sa magulang para sa simpleng night out.

Naka-kickback sa extra tuition.

Nakaranas ng scholarship.

Na-late sa klase dahil sa tanghaling paggising at sobrang bagal na daloy ng trapiko.

Nadisgrasya ng masasamang-loob at nawalan ng gamit.

Kabataan na naghihinagpis sa init ng kwarto tuwing tanghali. Para sa mga madadaldal na hapon at bakanteng oras na pinagbibidahan ni Prince Caspian, Naruto, LA Blue Girl, o ni Iron Man.

Kabataang napakaasintado sa sago na mahirap tanggalin sa uniporme.

Eroplanong papel. Para sa yoyo, sa trumpo, at sa sipang tingga na napakahirap habulin lalo na't hustler sumipa ng black magic si classmate.

Nag-aagawan-base sa school grounds. Para sa amoy araw na after lunch subjects dahil sa mga naglalaro ng basketball.

Nangain ng isaw sa kanto, pisbol, kikiam, ice scramble, gulaman, at sangkaterbang chichirya.

Napagalitan sa pagiging tamad.

Nagliligawan sa ilalim ng puno at sa loob ng walang taong classrooms.

Napatayo sa sulok, nabulyawan, napalo, nabato ng eraser, napadala sa guidance office, nakipagsagutan sa teacher, at sa naipatawag ang magulang.

Nakasira ng ceiling fan at plastic na figurine ng Mama Mary, dahil sa pagba-volley ball sa loob ng classroom.

Nakabasag ng test tubes at flasks, at nakasunog ng chemicals at kaklase.

Bumagsak, bumagsak, bumagsak, at bumagsak pa.

Hindi natulog ng halos isang linggo para lang sa walang kwentang resulta at sa mga pumetiks pero perpek ang iskor.

Naadik sa gimik, sa yosi, inuman, tambay, babae, computer games, bilyar, at pag-aaral (wushuuuu).

Nakipagpersonalan sa mga instructor at nabigo sa laban, sumipsip at nagkamit ng tagumpay.

Naging butihing mag-aaral na walang ibang hinangad kundi ang kabutihan ng magulang at pamilya at nagtagumpay ng lubos.

Nag-angas at walang mabuting idinulot sa kapwa mag-aaral na naghahanap ng matinding negative karma sa buhay.

Naging mag-aaral, one point in their lives...

Pasukan na naman!